अभिनेता पल शाह अभिनय र म्यूजिक भिडियोको साथै आजभोली सामाजिक कार्यमा पनि निकै नै सक्रिय हुन थालेका छन् । कोरोनाको समयमा पनि उनले समस्यामा परेका धेरै जनालाई सहयोग गरेका थिए ।
कहिल्यै रकम त कहिल्यै साना बालबालिकालाई खाना खुवाएर उनले सहयोग गरेका थिए । पलले गरेको गरिब दुखीको सहयोग देखेर पनि उनका फ्यानहरु निकै खुसी भएका छन् । फेरि पनि उनी समस्यामा परेकाहरुलाई सहयोग गर्न कालिकोट पुगेका छन् ।
कालिकोटमा यसै साता गएको बाढी पहिरोका कारण ठूलो जनधनको नोक्सान भएको खबर सुनेपछि पल खाद्यान्न, लत्ता कपडा बोकेर त्यता लागेका हुन् । पल शाह प्रतिष्ठान र हाम्रो टिम नेपालको सहकार्यमा कालिकोटका ४० घर परिवारलाई सिरक–डसना, खाद्यान्न सामाग्री वितरण गरिनेछ ।
पलले कालिकोट पुग्न २ दिन लाग्ने भएकाले बाटोमा जादैँ गर्दा नै त्यहाँका बासिन्दालाई राहत दिने बताएका छन् । साथै उनले कालिकोटपछि अछाम जाने पनि बताएका छन् । अछाममा पनि बाढीका कारण धेरै नै मानिस समस्यामा परेका भएकाले त्यहाँका मानिसलाई पनि राहत दिने पल लगायतको उनको समूहको योजना रहेको छ ।
