भारतमा कोरोना संक्रमण दिनप्रतिदिन बढ्दो क्रममा छ । यस्तो अवस्थामा फिल्मको सुटिङ गर्नु भनेको जानी जानी जोखिम मोल्नु नै हो । तरपनि भारत सरकारले फिल्म छायांकनको लागि अनुमति दिइसकेको छ ।
यसैबिच बलिउडका केही कलाकार धमाधम फिल्म छायांकनमा उत्रिसकेका छन् । केहीदिन अघिमात्र बलिउड अभिनेता अक्षय कुमार फिल्म छायांकनको लागि परिवारसहित लण्डन उडेका थिए ।
यस्तै हुमा कुरैशी पनि चलचित्रको छायांकनको लागि नै ग्लासओ पुगेकी छिन् । उनी चलचित्र बेल बटनको छायांकनको लागि गएकी हुन् । अक्षय कुमार पनि उनीसँगै नै छन् ।
हुमा र अक्षयसँगै अभिनेत्री लारा दत्ता पनि छायांकनको लागि ग्लासओ छिन् । यस्तै आमिर खान केहीदिन अघि लालसिंह चढ्ढा को लागि टर्की पुगेका छन् । नायिका मौनी रोय पनि हाल चलचित्रको छायांकनको लागि नै लण्डन पुगेकी छिन् ।
उनी लकडाउन भन्दा अगाडी नै दुबई पुगेकी थिइन् । यसरी धमाधम एकैचोटी चलचित्रको काम सुरु गर्नु डरमर्दो नै छ । तरपनि बलिउडका कलाकारले जोखिम मोलेरै आफ्नो कामलाई प्राथमिकता दिएका छन् ।
