एक महिलाले कानूनले दोषी ठहर गरेका यौन अपराधीलाई सुधार्न सक्छु कि भन्ने हिसाबले उनीसँग प्रेम गरिन् । तर विडम्बना उनले सोचेजस्तो केहीपनि भएन । ती पुरुष सुध्रिनु त परको कुरा उल्टो उनी उक्त महिलाकी १३ बर्षकी छोरीलाई बलात्कार गरी हत्या गरेर फरार भएका छन् ।
३३ बर्षका निकिता सिल्नोभ ४० बर्षकी जेल अधिकारी वार्डर एकातेरिना शोलोकाभासँग सम्बन्धमा थिए । सिल्नोभले एकातेरिना कार्यरत जेलमा ११ वर्षको सजाय काटेर बाहिर निस्किएपछि नै उनी एकातेरिनासँग सम्बन्धमा थिए । रुसी पुलिसले बालिका हत्या गरिनुअघि बलात्कृत भएकी थिइन् वा थिइनन् भन्ने विषयमा थप अनुसन्धान गरिरहेको छ ।
प्राप्त जानकारी अनुसार उक्त महिलाले छोरीलाई प्रेमी सिल्नोभसँग घरमा छोडेर आफू अस्पताल गएकी थिइन् । अस्पतालमा पुगेपछि महिलाको आफ्नी छोरीसँग एकपटक कुरा भएको थियो । त्यसपछि सिल्नोभले उक्त महिलाको फोन नै उठाउन छोडेका थिए । फोन नउठेपछि महिलाले आफ्नो घरमा तुरुन्त जाँच गर्न अराइन् । अधिकारीहरुले उनको घरमा जाँच गर्दा बालिकाको शव फेला परेको थियो । सिल्नोभ त्यहाँबाट भागिसकेका छन् । उनलाई प्रहरीले तिव्र रुपमा खोजिरहेको छ ।
