काठमाडौँ । नेपाली काँग्रेसबाट बूढानीलकण्ठ नगरप्रमुखको उम्मेदवारमा विनोद चालिस सर्वसम्मत चयन गरेको छ । उनले आजै उम्मेद्वारी मनोनयन समेत दर्ता गरिसकेका छन् । बूढानीलकण्ठ–११ निवासी नेता विनोद चालिसे नेपाली कांग्रेस भित्रका प्रभावशाली नेता समेत हुन् ।
नेपाली काँग्रेसका महामन्त्री गगन थापाका निकट मानिने नेता चालिसे २०४६ सालदेखि प्रजातन्त्र पाप्तिको आन्दोलनदेखि राजनीतिमा होमिएका हुन् । उनले २०४८ सालको संसदीय निर्वाचन नेपाली कांग्रेस पार्टीलाई विजयी बनाउन आफ्नो क्षेत्रबाट महत्त्वपूर्ण योगदान गरेका थिए ।
२०५० सालदेखि नेबिसंघ गाउँ कमिटी सचिव, क्षेत्रीय सभापति, जिल्ला सदस्य, जिल्ला सह–सचिव हुँदै २०५३ सालमा नेबिसंघको तर्फबाट विश्व भाषा क्याम्पसमा स्वतन्त्र विद्यार्थी युनियनमा समेत निर्वाचित नेता हुन् विनोद चालिसे ।
नेपाली काँग्रेसको राजनीतिमा तत्कालीन क्षेत्रीय सभापति परशुराम पोखरेलको कमिटीमा आमन्त्रित सदस्य भई काम गरिसकेका चालिसे साविक कपन गाउँ विकास समितिको इकाई सभापति, बूढानीलकण्ठ नगर समिति सचिव, क्षेत्र नम्बर ४ को सचिव, प्रदेश ‘ख’ क्षेत्र नम्बर ४ को सभापति हुँदै पार्टीको १४औँ राष्ट्रिय महाधिवेशनका लागि समेत प्रतिनिधिमा छनोट भईसकेका छन् ।
व्यवस्थापन विषयमा स्नातकोत्तर तथा शिक्षा शास्त्रमा स्नातकसम्म अध्ययन गरेका चालिसले कपनस्थित ग्राम शिक्षा मावि सहित विभिन्न क्याम्पसहरुमा लामो समय प्राध्यापन समेत गराईसकेका छन् ।
बैद्धिक व्यक्तित्वका साथै कवि तथा गीतकारको रूपमा समेत चिनिने चालिसेले ‘तिम्रो आँखाको आकाश’ कविता संग्रह तथा ‘मनको धुन’ गीति एल्बम बजारमा ल्याईसकेका छन् ।
नेता चालिसेले २०७२ सालको भूकम्प होस् वा कोभिड १९ को महामारी दुवै अप्ठ्यारो समयमा पार्टीको तर्फबाट नगर विपत व्यवस्थापनमा सहयोग गर्नुका साथै स्वयमसेवी रुपमा समेत जनसेवा गरेका छन् ।
यो पनि पढ्नुहोस्
