काठमाडौं । नेकपा एमाले निर्वाचन परिचालन कमिटी, बूढानीलकण्ठले आयोजना गरेको स्थानीय तह निर्वाचन २०७९ मा बूढानीलकण्ठ नगरपालिकामा निर्वाचित जनप्रतिनिधिहरुलाई बधाई तथा शुभकामना एवम् प्रमाणपत्र वितरण कार्यक्रममा नगरप्रमुख मिठाराम अधिकारीले विकास निर्माण मार्फत जनताविच एमालेलाई स्थापित गर्ने प्रतिवद्धता जनाएका छन् ।
पार्टी विभाजनको जटिल अवस्थामा समेत नगरवासीले आफू र आफ्नो पार्टीलाई अत्याधिक मत दिएर निर्वाचित गराएकोमा धन्यवाद ज्ञापन गर्दै आफ्नो कार्यकालभित्र पार्टीको नीति बमोजिम ‘आफू शासक नभई जनताको सेवक हुने’ संकल्प गरेका छन् ।
प्रमुख अतिथि नेकपा एमालेका बरिष्ठ उपाध्यक्ष एवम् पूर्व उपप्रधानमन्त्री ईश्वर पोखरलले जननिर्वाचित प्रतिनिधिलाई जनताको विश्वास डगमगाउन नदिई जनताको सेवामा लाग्न निर्देशन दिए ।
कार्यक्रममा निर्वाचन परिचालन कमिटीका संयोजक नेकपा एमाले प्रदेश कमिटी सदस्य उद्धव खरेलले स्थानीय निर्वाचन २०७९ मा आफ्नै भतिजलाई स्वतन्त्र उम्मेद्वारी दर्ता गराई, आफ्नै वडामा मत माग्न समेत नहिडी सबै वडा सदस्य हराएका उनले आफ्नो नेतृत्वमा नेकपा एमाले बूढानीलकण्ठले अत्याधिक सफलता हासिल गरेको उद्घोष गर्दा कार्यकर्ताहरु मुखामुख गरेका देखिन्थे ।
नेकपा एमाले बूढानीलकण्ठ अध्यक्ष प्रदीप डंगोलले संचालन गरेको कार्यक्रममा उपप्रमुख अनिता लामा, निर्वतमान उपप्रमुख रमादेवी राई, नेकपा एमाले काठमाडौं जिल्ला कमिटीबाट बूढानीलकण्ठ नगरपालिका ईञ्चार्ज लक्ष्मी संग्रौला लगायतले आफ्नो धारणा राखेका थिए भने नेकपा एमालेबाट निर्वाचित जनप्रतिनिधिहरुलाई प्रमुख अतिथि लगायत मञ्चमा आसिन अतिथिहरुले रुद्राक्षको माला लगाई प्रमाणपत्र वितरण गरेका थिए ।
यो पनि पढ्नुहोस्
