सत्तारुढ शीर्ष नेताहरू सिट बाँडफाँट टुंग्याउन छलफलमा

काठमाडौं । समानुपातिकतर्फको बन्दसूची पेस गरेपछि सत्तारुढ गठबन्धन प्रत्यक्षतर्फको सिट बाँडफाँट टुंगो लगाउन छलफलमा जुटेका छन् ।

आज बिहान बालुवाटारमा भएको छलफलमा सामान्य कुराकानी भएको र बेलुकी ४ बजे पुनः छलफल गरिने नेकपा (एकीकृत समाजवादी)का नेता झलनाथ खनालले जानकारी दिए ।

“समानुपातिकको बन्दसूची सबै दलले बुझाइसकेका छन् । अब प्रत्यक्षतर्फ संघ र प्रदेशको टुंग्याउनु छ,” खनालले भने, “अहिले सामान्य प्रिन्सपलबारे छलफल भयो । बेलुका ४ बजे बस्नेछ ।”

त्यस्तै, राष्ट्रपतिले नागरिकता विधेयक प्रमाणीकरण नगरे के गर्ने भन्नेबारे पनि सामान्य छलफल भएको उनको भनाइ छ । संसद्ले दोस्रोपटक पारित गरेर पठाएको नागरिकता विधेयकको आज १५ दिन पुगेको छ ।