काठमाडौं । सत्तारूढ दल नेकपा (एमाले)का सांसद योगेश भट्टराईले नेपालमा वार्षिक चार हजारभन्दा बढी मानिसको मृत्यु सडक दुर्घटनामा परेर हुने बताएका छन् ।
बुधबारको प्रतिनिधिसभा बैठकमा उनले विश्वमा सडक दुर्घटना कम गर्न विभिन्न काम गरिएको भन्दै नेपालमा भने दुर्घटना बढिरहेको बताएका हुन् ।
उनले सडक दुर्घटनामा परी नेपालमा धेरै युवाले ज्यान गुमाउँदै गएको तथ्यांक प्रस्तुत गरे ।
“नेपाल प्रहरीले पनि तीन हजार बढी भएको तथ्यांक देखाउँछ । यसबाट वार्षिक ३ प्रतिशत जीडीपी गुमाएको तथ्यांक छ । यो डरलाग्दो तथ्यांक छ । दुईपांग्रे सवारीचालकको मृत्यु ५० प्रतिशत छ । सडक दुर्घटनाबाट युवा उमेर समूहका मृत्यु हुने गरेको छ,” उनले भने ।
संयुक्त राष्ट्रसंघ ‘रोड सेफ्टी’ र मृत्युदर घटाउन लागिपरेको भए पनि नेपालमा बढिरहेको उनले उल्लेख गरे ।
