काठमाडौँ । आईसीसी ट्वान्टी–ट्वान्टी विश्वकप एसिया छनोटमा ओमानले नेपालसामू १ सय ४६ रनको लक्ष्य दिएको छ ।
काठमाडौँको कीर्तिपुरस्थित टीयू क्रिकेट मैदानमा जारी खेलमा टस हारेर पहिले ब्याटिङ गरेको ओमानले निर्धारित २० ओभरमा ९ विकेट गुमाएर १ सय ४५ रन बनायो ।
ओमानका कप्तान जिशन मक्सुदले सर्वाधिक ३२ रनको योगदान दिए । यस्तै, निशम खुशी र प्रतिश अथवलेले २४–२४, शकिल अहमदले २२ तथा आयन खानले १८ रन बनाए ।
नेपालका करण केसीले तीन, सोमपाल कामी र सन्दीप लामिछानेले दुई–दुई तथा गुल्शन झा र अविनाश बोहराले एकएक विकेट लिए ।
समूहगत चरणको अन्तिम खेलअघि नै नेपाल र ओमान समूह ‘ए’ बाट सेमिफाइनलमा भने पुगिसकेका छन् । आज हुने खेलले समूह बितेको टुङ्गो लगाउने छ ।
जारी प्रतियोगितामा नेपालले सिंगापुरलाई ८ र मलेसियालाई ६ विकेटले हराएको थियो भने ओमानले मलेसियालाई ३२ र सिंगापुरलाई २२ रनले पराजित गरेको थियो ।
टी–ट्वान्टी अन्तर्राष्ट्रियमा नेपाल र ओमानबीच चार खेल भएका छन् । जसमा नेपाल तीन र ओमान एक खेलमा विजयी भएको छ ।
कात्तिक १९ गतेसम्म चल्ने प्रतियोगितामा ८ देश सहभागी छन् । जसअन्तर्गत समूह ‘ए’ मा नेपालसहित सिंगापुर, ओमान र मलेसिया छन् । समूह ‘बी’ मा यूएई, बहराइन, हङकङ र कुवेत छन् ।
