काठमाडौं । स्क्राबल क्लबको आयोजना तथा ब्राइट फ्युचर माविको सह–आयोजनामा चौथो अन्तर्राष्ट्रिय स्क्राबल प्रतियोगिता बिहीबारदेखि सुरु हुने भएको छ ।
प्रतिस्पर्धा शुक्रबारदेखि सुरु हुने भएपनि औपचारिक उद्घाटन भने बिहीबार हुने ब्राइट फ्युचरका निर्देशक मोहनकुमार कार्कीले बुधबार आयोजित पत्रकार सम्मेलनमा जानकारी गराए ।
प्रतियोगितामा नेपाल, भारत, श्रीलंका र अमेरिकाबाट ३८ खेलाडीको सहभागिता रहने स्क्राबल क्लबका अध्यक्ष केशवप्रसाद पराजुलीले जानकारी दिए ।
अमेरिकाका खेलाडीले शिक्षकलगायतको सहभागिता रहने साइड इभेन्टमा प्रतिस्पर्धा गर्ने छन् भने बाँकीले मुख्य प्रतियोगितामा खेल्ने छन् । यु–१६ उमेरसमूहको मुख्य प्रतिस्पर्धामा शीर्ष तीन स्थान हात पार्नेले क्रमशः १० हजार, ६ हजार र ४ हजार नगद पुरस्कार प्राप्त गर्ने छन् ।
ब्राइट फ्युचरका प्रिन्सिपल दयाराम थापाले स्क्राबलले मानिसको चिन्तन क्षमता अभिबृद्धि गराउन मद्दत पुग्ने धारणा व्यक्त गरे । प्रतियोगिता सञ्चालन गर्न करिब १० लाख ७० हजार रुपैयाँ खर्च हुने बताइएको छ । १५ चरणसम्म चल्ने प्रतियोगिताका खेलहरु नैकापस्थित ब्राइट फ्युचरमै हुनेछ । स्क्राबल कोठे पदको परिस्कृत रुप भएको जनाइएको छ ।
