तेक्वान्दोको एकल पुम्सेमा निर्मल र सुशिलालाई स्वर्ण

काठमाडौं । लुम्बिनी प्रदेशका निर्मल पुन मगर र कोशी प्रदेशकी सुशिला राईले प्रथम अन्तरप्रदेश राष्ट्रिय खेलकुदअन्तर्गत तेक्वान्दोमा सोमबार स्वर्ण जितेका छन् । एकल पुम्सेको पुरुषमा निर्मल र महिलामा सुशिलाले स्वर्ण जितेका हुन् ।

पुरुषमा गण्डकी प्रदेशका आयुश गुरुङ दोश्रो तथा कोशीका विवेक राई र बागमती प्रदेशका यबन्दिन दाहालले कांस्य जिते । महिलामा बागमतीकी कविना राईले रजत तथा लुम्बिनीकी सन्जना मगर र गण्डकीकी रितु बुढाथोकीले कांस्य जिते । महिला टिम पुम्सेमा कोशी पहिलो, गण्डकी दोश्रो तथा लुम्बिनी र बागमती तेश्रो बने । पुरुष टिम पुम्सेमा कोशीले स्वर्ण, बागमतीले रजत तथा लुम्बिनी र गण्डकीले कांस्य हात पारे ।

प्रदेश खेलकुद विकास परिषद्, बागमती प्रदेशको आयोजनामा भइरहेको अन्तरप्रदेश खेलकुदको पेयर पुम्सेमा कोशीका विवेक राई र सुशिला राईले स्वर्ण जिते । गण्डकीका आयुश गुरुङ र रितु बुढाथोकीले रजत तथा लुम्बिनीका निर्मल पुन मगर र सन्जना मगर/बागमतीका अब्बास अन्सारी र सुनमैया खातुन तेश्रो भए ।

करातेको पुरुष एकल कातामा बागमतीका अमृत थोकरले स्वर्ण, कोशीका विवेक राईले रजत तथा सुदूरपश्चिम प्रदेशका धर्मेन्द्र रेग्मी र लुम्बिनीका आजाद सिंहले कांस्य जिते । सो स्पर्धाको महिलामा सुदूरपश्चिमकी वर्षा साउद प्रथम, बागमतीकी एलिना थिङ द्वितीय तथा मधेश प्रदेशकी सुजाता परियार र कोशीकी रोस्मा राई तृतीय भए ।

टिम काताको पुरुष÷महिला दुवैमा बागमती पहिलो र लुम्बिनी दोश्रो स्थानमा रहे । पुरुषमा गण्डकी र कोशी तेश्रो बने । महिलामा गण्डकी र सुदूरपश्चिम तेश्रो भए ।

भलिबल : बागमती र सुदूरपच्छिमको जित
बागमती प्रदेश खेलकुद प्रतियोगिताको पहिलो दिनको खेलमा पुरुषतर्फ सुदूरपच्छिम प्रदेश र महिलातर्फ बागमती प्रदेशले सहज जित निकालेका छन् ।

सोमबार भएको पहिलो खेलमा सुदूरपच्छिम प्रदेशले बागमती प्रदेशलाई सोग्झो सेटमा हराएको हो ।

पहिलो सेटमा २५–२१ को जित निकालेको सुदूरपच्छिमले दोस्रो सेटमा २५–१८ र अन्तिम सेटमा २५–२१ को जित निकालेको हो ।
पुरुषतर्फ नै आज भएको दोस्रो खेलमा मधेस प्रदेशमाथि गण्डकी प्रदेशले ३–१ सेटको जित निकाल्यो ।

गण्डकी प्रदेशले २०–२५, २५–११, २५–२१ र २५–१८ को जित निकाल्यो ।

आज भएको पुरुषतर्फको अन्तिम खेलमा लुम्बिनी प्रदेशले कोशी प्रदेशमाथि ३–१ सेटको जित निकालेको छ ।

पहिलो सेटम १६–२६ ले पराजित भएको लुम्बिनी दोस्रो सेटमा २५–१८, तेस्रो सेटमा २५–१६ र चौथो सेटमा २५–२१ को जित निकाल्यो ।

महिलातर्फ आजको पहिलो खेलमा मधेस प्रदेशमाथि लुम्बिनी प्रदेशले सोझो सेटको जित हात पार्यो । लुम्बिनीले २५–१८, २५–२१ र २५–७ को जित निकाल्यो ।

दोस्रो खेलमा कर्णाली प्रदेशले सुदूरपच्छिममाथि सोझो सेटमा जित निकाल्यो । कर्णालीले २५–१४, २५–२२ र २५–२२ को जित निकाल्यो ।

आजको अन्तिम खेलमा बागमतीले कोशी प्रदेशमाथि सोझो सेटमा जित निकाल्यो । बागमतीले २५–७, २५–१३ र २५–१४ को जित निकाल्यो ।