बागलुङ । बागलुङको ढोरपाटन नगरपालिकास्थित बुर्तिबाङ स्वास्थ्य चौकीमा रोग प्रतिरक्षा शक्ति कमी भएका बिरामीहरूको पहिचान र उपचारसम्बन्धी सचेतनामूलक कार्यक्रम सम्पन्न भएको छ ।
नेपाल प्यासेन्ट इनिसिएटिभ फर प्राइमरी इम्युडिफिसिएन्सिज एन्ड इनबर्न एरर्स (NePOPII) नामक संस्थाको आयोजनामा भएको कार्यक्रममा डा.धर्मागत भट्टराईले सहजीकरण गरेका थिए ।
कुन कुन लक्षण देखिएमा प्रतिरक्षा शक्तिको कमी भएको मान्ने भन्ने विषयमा उनले जानकारी दिएका थिए । रोगको लक्षण देखिएमा त्यसको गरिाइमा पुगेर कारण खोज्नेतर्फ ध्यान दिनुपर्ने डा.भट्टराईले बताए । भट्टराई नेपालका एक मात्र इम्युनोलोजिस्ट हुन् ।
संस्थाका अध्यक्ष सन्दिप पौडेलले रोग प्रतिरक्षा शक्ति कमी भएका कारण विभिन्न रोगहरू लाग्न सक्ने भएकाले त्यससम्बन्धी सचेतना अभियान सञ्चालन गरिएको बताए । उनले वैशाख १५ गते पोखराबाट सुरु भएको अभियानको दोस्रो कार्यक्रम बागलुङमा सञ्चालन गरिएको जानकारी दिए ।
देशभरि नै यो अभियान अघि बढाउने पौडेलले बताए । रोग प्रतिरक्षा शक्तिको कमीका कारण विभिन्न रोगबाट पीडितहरूको संस्थाका रूपमा NePOPII गठन गरी अघि बढिएको उनको भनाइ थियो । विश्व PI सप्ताहअन्तर्गत सचेतना अभियान जारी रहेको उनले बताए ।
कार्यक्रममा बिरामी, बिरामीका परिवारका सदस्यहरू, स्वास्थ्यकर्मी, जनप्रतिनिधि, समाजसेवी र कर्मचारीहरूको सहभागिता रहेको थियो ।
