काठमाडौं । दोस्रो त्रैमासको अन्तिम कारोबार दिन सेयर बजार परिसूचक नेप्सेमा ०.५९ प्रतिशतको गिरावट हुँदा २६०० को बिन्दुबाट तल झरेको छ । सोमबार नेप्से परिसूचक १५.५४ अंकले गिरावट भएर २५९४.१३ मा झरेको हो ।
नेप्सेमा गिरावट भए पनि सोमबार कारोबार रकम भने उलेख्य बढेको छ । गत बिहीबार ७ अर्बमाथिको कारोबार भएको बजार आइतबार ४ अर्ब पनि पुग्न सकेको थिएन ।
सोमबार भने ६ अर्ब ६५ करोड ९ लाखको सेयर कारोबार भएको छ । ६४ हजार २ सय ७८ कारोबार मार्फत १ करोड ३८ लाख ७० हजार ५ सय ७९ कित्ता धितोपत्र किनबेच हुँदा उक्त रकम बराबर कारोबार भएको हो ।
निर्माण व्यवसायीको भुक्तानीमा समेत र अन्य क्षेत्रमा समेत कर्जा असुली प्रभावित हुँदा बैंकहरूको वित्तीय विवरण बिग्रिँदै गएको बैंकर बताउँछन् । साना तथा मझौला व्यवसाय कर्जा रिकभरीमा ठूलो समस्या तथा केही क्षेत्रमा धितो लिलाम समेत गर्न नसक्ने अवस्था रहेको बैंकर बताउँछन् । त्यस्तोमा दोस्रो त्रैमासमा वित्तीय विवरणमा दबाब बढ्दै गएको छ ।
बैंकहरूको वित्तीय विवरण बिग्रिन सक्ने भन्दै सेयर लगानीकर्तामा परेको मनोवैज्ञानिक प्रभावले लगातार दोस्रो दिन पनि नेप्सेमा दोहोरो अंकको गिरावट देखिएको हो । सोमबार नेप्सेमा सबै उपसूचकमा गिरावट भएको छ ।
व्यापार उपसूचक सर्वाधिक १.८९ प्रतिशतले गिरावट हुँदा होटल तथा पर्यटन उपसूचक १।३६ प्रतिशत र वित्त कम्पनी उपसूचक १.३२ प्रतिशतले गिरावट भएको छ ।
सोमबार नेप्सेमा कुल २ सय ४३ सूचीकृत कम्पनीको सेयर कारोबार भएको छ । जसमध्ये १ सय ७५ कम्पनीको सेयर मूल्यमा गिरावट हुँदा ६३ कम्पनीको बढेको छ ।
त्यस्तै ५ कम्पनीको कारोबार स्थिर छ । सोमबार कारोबार भएकामध्ये बाराही हाइड्रोपावरको सेयर मूल्य १० प्रतिशतले बढेर सकारात्मक सर्किट मूल्यमा बन्द भएको छ ।
यस्तै सुपर मादी हाइड्रोपावरको सेयर मूल्य ८.८७ प्रतिशत, नारायणी डेभलपमेन्ट बैंक ८.८१, सपोर्ट लघुवित्त ८.४१ र नेपाल एसबीआई बैंकको सेयर मूल्य ७.३० प्रतिशतले बढेर बन्द भएको छ ।
