भद्र घले चौथो केएमसी अन्तरविद्यालय बास्केटबल प्रतियोगिताको सिनियर ब्वाइजमा मंगलबार क्वाटरफाइनलमा प्रवेश गरेको छ ।
बुद्धनगरस्थित आयोजक केएमसीको कोर्टमा भद्र घलेले गोदावरी रेसिडेन्सियल स्कुललाई ४४–१४ ले सहजै पराजित गर्दै समूह ‘ए’ को विजेता बन्यो । भद्र घलेका दीपेन्द्र तोलाङ्गेले २० अंक जोडे ।
सिनियर ब्वाइजकै अन्य खेलमा विल्सन एकेडेमीले केएमसी ‘बी’ लाई ४९–१९, क्यान्भासले एम्बासडरलाई ५२–४१, हेम्सले बाल दीक्षा सदनलाई ४६–३२ र एभरेष्टले भीएस निकेतनलाई ३५–२५ ले हराए । विल्सनका रेहान डंगोलले ९, क्यान्भासका विसन खड्काले २६, हेम्सका सुशांक आचार्यले २९ र एभरेष्टका कृतिक सुवालले २० स्कोर गरे ।
जुनियर ब्वाइजमा पिपुल्स एकेडेमीले सनसाइनलाई २६–२१ ले पाखा लगायो । पिपुल्सका आयुश सिंहले २२ अंक जोडे । सिनियर गल्र्समा काठमाडौं शिक्षालय विरुद्धको खेलमा निस्ट २४–१३ ले विजयी भयो । निस्टकी संस्कृति पौडेलले ८ स्कोर गरिन् ।
